مہاراشٹر اسٹیٹ حج کمیٹی کی تشکیل

مولانا معین الدین قاسمی ریاستی کمیٹی کے رکن نامزد
ناندیڑ: ۶؍ستمبر (نامہ نگار)تقریباً چار سال کے عرصہ کے بعد ریاستی حکومت نے مہاراشٹراسٹیٹ حج کمیٹی تشکیل دے دی ہے ۔ اسمبلی چناؤ سے عین قبل حکومت نے نئی حج کمیٹی تشکیل دی ۔ حالانکہ گزشتہ حکومت کے دور میں ہی حج کمیٹی کی معیاد مکمل ہوچکی تھی مگر گزشتہ چار سال سے حج کمیٹی کی تشکیل کا معاملہ سرد خانہ میں پڑا ہواتھا ۔ ریاستی حکومت نے گزشتہ کل مہاراشٹر اسٹیٹ حج کمیٹی تشکیل دے دی ہے ۔ ریاستی حج کمیٹی کے تشکیل کے قوانین کے مطابق ایم پی کوٹہ سے راشٹروادی کانگریس پارٹی کے ایڈوکیٹ مجید میمن ، ایم ایل سی کوٹہ سے حسنیٰ بانو ، ایم ایل اے کوٹہ سے نواب ملک ، کارپوریٹر کوٹہ سے سید فاروق ، نجیب ملا ، فیروز لالہ تانبولی ، عالم دین کوٹہ سے مولانا عبدالجبار ممبئی ، مولانا معین الدین قاسمی ، مولانا انصار علی ناگپور ،



حکومت کی جانب سے سفارش کردہ سماجی خدمت گذار افراد کے کوٹہ سے ابراہیم غلام علی ممبئی ، سید ریاض ، رفیق پارکر رائے گڑھ ، شیخ سلطان امراؤتی ، قاضی مہتاب ممبئی کی نامزدگی عمل میں آئی ہے ۔اس طرح سے نئی حج کمیٹی تشکیل دے دی گئی ہے ۔ مہاراشٹراسٹیٹ حج کمیٹی کیلئے ناندیڑ سے پہلی بار مولانا معین الدین قاسمی کو نمائندگی کا موقع فراہم کیاگیا ہے ۔ بتایا جارہا ہے کہ سابقہ چیف منسٹر اشوک چوہان ، ضلع سرپرست وزیر ڈی پی ساونت نے ان کے نام کی سفارش کی تھی ۔ گزشتہ دنوں مہاراشٹر کے چیف منسٹر پرتھوی راج چوہان ناندیڑ کے دورے پرآئے تھے اس وقت مےئر عبدالستار ، مولانا معین الدین قاسمی ، ایڈوکیٹ عبدالرحمن صدیقی ، کارپوریٹر شفیع احمد قریشی ، عبداللطیف ، عبدالشمیم ، صابر چاؤش ، منتجب الدین نے بھی چیف منسٹر سے ملاقات کرکے اسٹیٹ حج کمیٹی اور اسٹیٹ وقف بورڈ تشکیل دینے کا مطالبہ کیا تھا ۔